ത്രികാലജ്ഞാനികളായ കാക്കകൾ രാവിൻറെ ഇരുൾച്ചിറകടിച്ചുകൊണ്ട് പറന്നു വരികയാണ് . ജന്മ രഹസ്യങ്ങളുടെ നിശ്ചല സമുദ്രങ്ങൾക്ക് മുകളിൽ അവ വട്ടമിട്ടു പറക്കുന്നു.  പരേതാത്മാക്കളുടെ മുറിഞ്ഞ വാക്കുകളെ കറുത്ത കരച്ചിൽ കൊണ്ട് അവ തോറ്റിയുണർത്തുന്നു.  കാക്കകൾ ദേവിയെ കാത്തിരിക്കുകയായിരുന്നു.  അവൾ വന്നു . രഹസ്യങ്ങളുടെ മഞ്ഞുപാളികളിൽ അവളുടെ മനസ്സിൻറെ പെരുവിരൽ അമരുമ്പോൾ രാത്രിയുടെ മൗനമുദ്രിതമായ ചൊടികൾ വിറയ്ക്കുന്നു . 'കലിക'യിലൂടെ മലയാളിയുടെ വായനയിൽ മാന്ത്രികതയുടെ അത്ഭുത സൗന്ദര്യം വിടർത്തിയ നോവലിസ്റ്റിന്റെ പ്രശസ്ത കൃതിയുടെ പുതിയ പതിപ്പ്.