വ്യത്യസ്തവും ശക്തവുമായ അഖ്യാന ശൈലികൊണ്ട് നിരൂപക പ്രശംസയേറ്റുവാങ്ങുകയും കേരള ഭാഷാ ഇൻസ്റ്റിറ്റ്യൂട്ട് പുരസ്കാരം നേടുകയും ചെയ്ത
ശ്രീ ജോസ് പാഴൂക്കാരൻ എഴുതിയ “അരിവാൾ ജീവിതം” 

ഗോത്ര സംസ്കൃതിയിലെ ജനിതക ഘടനയിൽ മരണത്തിൻ്റെ കുലചിഹ്നങ്ങൾ പതിപ്പിച്ച അരിവാൾ രോഗവും വയനാട്ടിലെ സാധാരണ മനുഷ്യരുമാണ് അരിവാൾ ജീവിതത്തിൽ ഉൾച്ചേരുന്നത്.

ജീവരക്തത്തിൽ പുളയുന്ന വേദനയുടെ പിശാചുക്കളെ തടയാനാകാതെ വലയുന്ന ആദിവാസി സമൂഹവും അവരുടെ വേദനകളെ ചൂഷണം ചെയ്യുന്ന ആധുനിക ലോകവും അരിവാൾ ജീവിതത്തിൽ അനാവൃതമാകുന്നു. വേദനസംഹാരികളെ ഭക്ഷണമാക്കുന്ന പുതിയ തലമുറയോട് അരിവാൾ ജീവിതം സംസാരിക്കുന്നത് പുതിയ ഭാഷയിലാണ്—ജീവിതം അതിജീവിക്കലായി മാറുന്നവരുടെ കഥ, ജോസ് പാഴൂക്കാരൻ്റെ തീക്ഷ്‌ണമായ രചന.

അട്ടയെക്കൊണ്ട് ചോരയൂറ്റിച്ചും ലോഹം പഴുപ്പിച്ച് ചൂട് വെച്ചും നിസ്സഹായരായി നിലത്ത് വീണുരുണ്ടും ഗോത്രവംശജർ സ്വന്തം ശരീരങ്ങളിൽ നിന്ന് പിഴുതുമാറ്റാൻ പെടാപ്പാട് പെടുന്ന നൊമ്പരത്തെപ്പറ്റി പറയുന്ന ഒരു നോവൽ.